بۇرناعى كۇنى «ماكس-2015» XII حالىقارالىق اۆياتسيالىق-عارىشتىق سالونى باستالدى. بۇل كورمەگە تاجىريبە جيناقتاۋ جانە ۇيىمداستىرۋ ادىستەرىن جەتىلدىرۋ ماقساتىندا قازاقستان قورعانىس مينيسترلىگىنىڭ اسكەري قىزمەتشىلەرى قاتىسۋدا.
«ماكس-2015» XII حالىقارالىق اۆياتسيالىق-عارىشتىق سالونىنىڭ اياسىندا رەسپۋبليكا قورعانىس ءمينيسترى يمانعالي تاسماعامبەتوۆ «روستەح» مەملەكەتتىك كورپوراتسياسىنىڭ باس ديرەكتورى سەرگەي چەمەزوۆپەن, «روسوبورونوەكسپورت» باس ديرەكتورى اناتولي يسايكينمەن, سونداي-اق, «يركۋت» كورپوراتسياسىنىڭ پرەزيدەنتى يگور دەمچەنكومەن جانە «رەسەي تىكۇشاقتارى» ااق باس ديرەكتورى الەكساندر ميحەەۆپەن كەزدەستى. كەزدەسۋلەر وتاندىق قورعانىس ونەركاسىپ كەشەنىن دامىتۋ ماقساتىندا وتكىزىلدى.
اۆياسالوننان اۆياتەحنيكانىڭ اسكەري جانە ازاماتتىق ۇلگىلەرىن جانە وعان قاتىستى ماتەريالداردى, سونداي-اق, تاجىريبەلى ۇشۋ اپپاراتتارى مەن اسكەري جيىنتىقتاردى كورۋگە بولادى. كورمەگە بارلىعى 800-دەن استام كومپانيالار مەن ۇيىمدار قاتىسۋدا. وسىنداي اۋقىمدى ءىس-شارانىڭ كورشى ەلدە ءوتۋى الداعى كەزدە استانادا بولاتىن «KADEX-2016» حالىقارالىق كورمەسىن وتكىزۋگە تاجىريبە جيناقتاۋ ءۇشىن ايتارلىقتاي ماڭىزى بار.
«ءبىز «KADEX» كورمەسىنىڭ ەرەكشە, سيرەك وتەتىن ەرەكشەلىگى بولعانىن قالايمىز. ونىڭ كوپ جوسپارلى قۇرىلىمى بار. كورمەدە تەك اۆياتەحنيكا جاسايتىن اۆياشوۋ عانا ەمەس, سونىمەن بىرگە, قۇرلىق اسكەرلەرى جانە تەڭىز اسكەرلەرى ءوزىنىڭ قارۋ-جاراعى مەن بار قۋاتىن كورسەتەدى. بۇلاردىڭ ءبارى كەز كەلگەن كورمەنى ۇيىمداستىرۋ ءۇشىن اسا ماڭىزدى», – دەدى رەسپۋبليكا قورعانىس مينيسترلىگى اسكەري-تەحنيكالىق ساياسات دەپارتامەنتىنىڭ باستىعى پولكوۆنيك باقىت قۇرمانباەۆ, دەپ حابارلادى وسى ۆەدومستۆونىڭ ءباسپاسوز قىزمەتى.